Wednesday, October 19

தொடர்பு எல்லைக்கு அப்பால்





அலைபேசியில் தொடர்புகளைத்
தொடும் போதெல்லாம் என்னை
ஒரு நிமிடம் உலுக்கிவிட்டுச் 
செல்லும் அவள் எண்

அந்த எட்டு எண்களில் 
ஒளிரும் சிரித்த முகம் 
பல கதைகள் பேசிவிட்டுப் போகும்

என்னவோ தெரியவில்லை
எத்தனையோ புகைப்படங்கள் கையில் இருந்தும்
என் நினைவை வருடுவது
ஒருமுறை வெளிநாடு செல்ல
கை அசைத்தபடியே விடைபெற்ற 
அந்தப் பரவச முகம்…
என் மனதில் மட்டுமே
பிரத்தியேகமாக எடுக்கப்பட்டு சேமிக்கப்பட்டது..

புற்றுநோய் அரக்கனிடம்
போராடித் தோல்வியைத் தழுவித்
தொடர்பு எல்லைக்கு அப்பால் அகன்று
ஆகிவிட்டன சில ஆண்டுகள்…
 
அவளுக்கும் எனக்குமான தொடர்பு
மொத்தமாக அழிந்துவிடுமோ என்ற எண்ணத்தில்
மனதில் சுமப்பதைவிட
அலைபேசியில் இருப்பது ஒன்றும்
அத்தனை கனமில்லை என்பதால்
அழிக்க மனமில்லாமல் 
அப்படியே விட்டுவிட்டேன்
அவளுடைய தொடர்பு எண்ணை….